Naxçıvan Muxtar Respublikası

Güləş Federasiyası

Yunan-Roma güləşi üzrə şəhər birinciliyi

26 iyul 2019-cu il tarixdə Naxçıvan Şəhər Uşaq-Gənclər İdman Məktəbində məktəblilərin yay tətilinin səmərəli təşkili məqsədilə yeniyetmə və gənclər (2003-2005-ci illər) arasında yunan-roma güləşi üzrə Naxçıvan şəhər birinciliyi keçirilmişdir. Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək birinciliyin keçirilmə məqsədi haqqında idmançılara geniş məlumat vermiş və onlara qalibiyyət sevinci arzulamışdır. Naxçıvan Muxtar Respublikası Güləş Federasiyası və Naxçıvan Şəhər Gənclər və İdman İdarəsinin birgə təşkilatçılığı ilə keçirilən birincilikdə 9 çəki dərəcəsi üzrə 50 idmançı öz qüvvələrini sınamışlar. Birinciliyin yekununa əsasən, Nicat Ocaqquliyev 35 kq, Elmir Zamanov 38 kq, İlkin Əliyev 41 kq, Samir Bağırzadə 44 kq, Tuncay Məmmədov 47 kq, Uğur Məmmədov 52 kq, Nuruağa Əhmədov 57 kq, Kəramət Xudiyev 62 kq və Rəvan Bayramov 85 kq çəki dərəcələrində I yerlərə layiq görülmüşlər. Sonda hər çəki dərəcəsində I, II və III yerləri tutan idmançılara Naxçıvan Şəhər Gənclər və İdman İdarəsinin diplomları təqdim edilmişdir.

 

 

 

İdmançımızdan daha bir medal

Tovuz Olimpiya İdman Kompleksində 2 iyul – Azərbaycan Polisi Gününə həsr olunmuş cüdo üzrə 2003-2005-ci illər təvəllüdlü yeniyetmələr arasında respublika turniri keçirilib.

Turnirdə Naxçıvan Muxtar Respublikası Güləş Federasiyasının yetirməsi Abbas Məmmədov da iştirak edib. 55 kiloqram çəki dərəcəsində mübarizə aparan idmançımız üçüncü olub.
Cüdoçumuza təşkilatçılar tərəfindən diplom və medal təqdim edilib.

 

 

 

Cüdoçularımızdan böyük uğur

19-26 iyun 2019-cu il tarixlərdə Türkiyənin Rizə şəhərində cüdo üzrə təlim-məşq toplanışı keçirilib.

Həmin təlim-məşq toplanışında Azərbaycan komandasının tərkibində Naxçıvan Muxtar Respublikası Güləş Federasiyasının iki idmançısı da iştirak edib. Təlim-məşq toplanışı bitdikdən sonra 27 iyun 2019-cu il tarixdə Trabzon şəhərində cüdo üzrə Qaradəniz turniri keçirilib. Turnirdə iştirak edən iki idmançımız uğurlu nəticələrlə adlarını qaliblər sırasına yazdırıblar. Belə ki, Rauf Cabbarov 55 kiloqram çəki dərəcəsində, Qalib Qaybalıyev isə 50 kiloqram çəki dərəcəsində gümüş medal qazanıblar.

Qaliblər diplom və medallarla mükafatlandırılıblar.

 

 

 

Şəhər birinciliyində qaliblər mükafatlandırılıblar

18 iyun 2019-cu il tarixdə Naxçıvan şəhər Uşaq-Gənclər İdman Məktəbində “15 iyun–Milli Qurtuluş Günü” münasibətilə yeniyetmələr (2008-2009-cu illər) arasında cüdo üzrə Naxçıvan şəhər birinciliyi keçirilmişdir. Tədbirin açılış mərasimində çıxış edənlər “15 iyun-Milli Qurtuluş günü” haqqında idmançılara geniş məlumat vermiş və onlara uğurlar arzulamışlar. Naxçıvan MR Güləş Federasiyası və Naxçıvan Şəhər Gənclər və İdman İdarəsinin birgə təşkilatçılığı ilə keçirilən yarışda 9 çəki dərəcəsi üzrə 50-ə yaxın idmançı iştirak etmişdir. Birincilikdə oğlan idmançılar ilə yanaşı qız idmançılarda öz güclərini sınamışlar. Birinciliyin yekununa əsasən, Elvin Cəfərli 24 kq, Əliislam Səfərov 27 kq, Əli Cəfərov 30 kq, Atilla Rəhimli 34 kq, Nurəddin Əkbərli 38 kq, Tayfun İmanlı 46 kq, Aqil Hüseynov 50 kq və İsa Həbibbəyli 55 kq çəki dərəcələrində, qızlar arasında isə Səkinə Bağırlı 30 kq çəki dərəcəsində I yerlərə layiq görülmüşlər. Sonda hər çəki dərəcəsində I, II və III yerləri tutan idmançılar Naxçıvan Şəhər Gənclər və İdman İdarəsinin diplomları ilə təltif olunmuşlar.

Güləşçimiz erməni rəqibini məğlub edib

Gürcüstan Respublikasının Kutaisi şəhərində sərbəst güləş üzrə beynəlxalq turnir keçirilib.

Turnirdə Naxçıvan Muxtar Respublikası Güləş Federasiyasının idmançısı da mübarizə aparıb. 38 kiloqram çəki dərəcəsində döşək üzərinə çıxan Yəhya Paşayev yarımfinal mərhələsinə kimi gütün rəqiblərini məğlub edib. Bu mərhələdə məğlubiyyətlə üzləşən güləşçimiz üçüncü yer uğrunda görüşdə ermənistanlı idmançı ilə üz-üzə gəlib. Keçirilən qarşılaşmada böyük əzmkarlıq göstərən Yəhya Paşayev rəqibini məğlub edərək beynəlxalq turnirin bürünc medalını qazanıb.

İdmançımız təşkilatçılar tərəfindən diplom və medalla mükafatlandırılıb.