Naxçıvan Muxtar Respublikası

İslam Hümbətov adına Uşaq-Gənclər İdman Məktəbində məktəblilərin yay tətilinin səmərəli təşkil edilməsi məqsədilə kiçikyaşlı yeniyetmələr (2005-2007-ci illər) arasında cüdo üzrə Naxçıvan şəhər birinciliyi keçirilib. Naxçıvan Şəhər Gənclər və İdman İdarəsinin baş məsləhətçisi Elşən Rəfiyev tədbiri açıq elan edib və yarışın keçirilmə məqsədi haqqında idmançılara məlumat verib. Naxçıvan Muxtar Respublikası Güləş Federasiyasının sədr müavini Faiq İsgəndərov isə yarışın keçirilmə qaydaları haqqında idmançıları məlumatlandırıb. Naxçıvan Muxtar Respublikası Güləş Federasiyası ilə Naxçıvan Şəhər Gənclər və İdman İdarəsinin birgə təşkil etdiyi birincilikdə 7 çəki dərəcəsi üzrə 40-a yaxın idmançı qüvvəsini sınayıb. Beynəlxalq Cüdo Federasiyasının mövcud qaydalarına əsasən keçirilən yarışda Heydər Zamanov, Xaspolad Tutayuq, Orxan Niftəliyev, Əsgər Səfərov, Əziz Hacıyev, Rauf Cabbarov və Rüfət Zeynallı müvafiq olaraq 23, 26, 29, 32, 35, 42 və 46 kq çəki dərəcələrində bütün rəqiblərini üstələyərək birinciliyin qalibi olublar.

Sonda hər çəki dərəcəsində yer tutan idmançılar diplomlarla təltif ediliblər.

Naxçıvan Muxtar Respublikası Güləş Federasiyasının yetirmələrinin cari ildə beynəlxalq turnirlərdə qazandığı uğurlara daha biri əlavə olunub. Belə ki, Ukraynanın Odessa şəhərində sərbəst güləş üzrə keçirilən XII Avropa Beynəlxalq Turnirində Naxçıvan güləş məktəbinin yetirməsi Abbas Məmmədov da mübarizə aparıb. 34 kiloqram çəki dərəcəsində turnirdə iştirak edən güləşçimiz bütün rəqiblərinə tam üstünlüklə qalib gələrək finala yüksəlib. Həlledici qarşılaşmada Abbas Məmmədovun rəqibi rusiyalı güləşçi olub. İdmançımız final görüşündə də qalib gələrək turnirin baş mükafatını qazanıb.

Sonda idmançımıza təşkilatçılar tərəfindən diplom, medal və kubok təqdim olunub.

İslam Hümbətov adına Uşaq-Gənclər İdman Məktəbində “15 İyun - Milli Qurtuluş Günü” münasibətilə yeniyetmələr (2001-2003-cü illər) arasında yunan-roma güləşi üzrə Naxçıvan şəhər açıq birinciliyi keçirilmişdir. Birinciliyin açılış mərasimində çıxış edən Naxçıvan Şəhər Gənclər və İdman İdarəsinin rəisi Xəyal Qurbanov Azərbaycan xalqının tarixinə qızıl hərflərlə yazılmış 15 İyun – Milli Qurtuluş Günü haqqında danışaraq idmançılara geniş məlumat vermiş və onlara qalibiyyət sevinci arzulamışdır. Sonra Naxçıvan MR Güləş Federasiyasının sədr müavini Faiq İsgəndərov çıxış edərək idmançılara yarışın qaydalarını xatırlatmış və onlara uğurlar arzulamışdır. Naxçıvan MR Güləş Federasiyasının və Naxçıvan Şəhər Gənclər və İdman İdarəsinin birgə təşkil etdiyi birincilikdə 11 çəki dərəcəsi üzrə 50-ə yaxın pəhləvan qüvvəsini sınamışdır. Açıq birincilikdə Naxçıvan şəhər idmançıları ilə yanaşı, Ordubad rayonunun idmançıları da iştirak ediblər. Beynəlxalq Güləş Federasiyasının mövcud qaydalarına əsasən keçirilən yarışda Uğur Məmmədov (32 kq, Naxçıvan), Məcid İbrahimov (35 kq, Naxçıvan), Hüseyn Əhmədli (38 kq, Naxçıvan), Mehdi Əsədov (42 kq, Naxçıvan), Abbas Nəzərəliyev (46 kq, Naxçıvan) Anar Həsənov (50 kq, Naxçıvan), Asəm Yüzbaşıyev (54 kq, Naxçıvan), Abbas Həsənov (58 kq, Naxçıvan), Nihad Babayev (63 kq, Ordubad), Gündüz Məmmədov (69 kq, Naxçıvan), Musa Mehdiyev (76 kq, Naxçıvan) bütün rəqiblərini üstələyərək birinciliyin qalibi olmuşlar. Sonda hər çəki dərəcəsində yer tutan güləşçilər Naxçıvan Şəhər Gənclər və İdman İdarəsinin diplomları ilə mükafatlandırılmışlar.

“28 may-Respublika Günü”nə həsr edilmiş 2 nömrəli Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin açıq birinciliyi keçirilmişdir. Naxçıvan Muxtar Respublikası Güləş Federasiyasının yetirməsi Məmmədov Abbas Hafiz oğlu I yerə layiq görülmüşdür.

Mayın 6-da Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 93-cü ildönümünə həsr olunmuş “Heydər Əliyev kuboku” uğrunda yeniyetmələr arasında sərbəst güləş üzrə Naxçıvan Muxtar Respublika birinciliyinin açılış mərasimi keçirilmişdir.

Əvvəlcə Azərbaycan Respublikasının Dövlət Himni səslənmişdir.
Naxçıvan Muxtar Respublikası Güləş Federasiyasının sədri Azər Zeynalov Azərbaycan xalqının ümummilli lideri Heydər Əliyevin anadan olmasının 93-cü ildönümünə həsr olunmuş “Heydər Əliyev kubo­ku” uğrunda sərbəst güləş üzrə muxtar respublika birinciliyinin iştirakçılarını salamlamış və idmançılara uğurlar arzulayaraq demişdir: Azərbaycanda idmanın inkişafı ümummilli lider Heydər Əliyevin adı ilə bağlıdır. Ulu öndərin Azərbaycan Respublikasına rəhbərliyi dövründə digər sahələrdə olduğu kimi, idmanın da inkişafına böyük diqqətlə yanaşılmış, idmanın və bədən tərbiyəsinin inkişafı dövlət siyasətinin prioritet istiqamətlərindən birinə çevrilmişdir. Bu dövrlərdə idmanla bağlı qanunvericilik bazasının təkmilləşdirilməsi ilə yanaşı, idmanın maddi-texniki bazası da yaxşılaşdırılmış, idman kompleksləri tikilmiş, meydançalar salınmış, böyük idman-sağlamlıq mərkəzləri yaradılmış, onlardan səmərəli istifadə təmin edilmişdir. Əsası ümummilli lider Heydər Əliyev tərəfindən qoyulan dövlət idman siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bunun nəticəsidir ki, idmana dövlət qayğısı daha da artmış, onun maddi-texniki bazası daha da möhkəmləndirilmişdir. Bunun da nəticəsində müstəqil Azərbaycan həm də bir idman ölkəsi kimi beynəlxalq aləmdə tanınmış və olimpiya hərəkatına qoşulmuşdur. 
Qeyd olunmuşdur ki, bu gün Naxçıvan Muxtar Respublikasında da idmanın inkişafı sahəsində mühüm işlər görülür, gənclərin fiziki və mənəvi hazırlığı, onların asudə vaxtlarının səmərəli təşkili diqqət mərkəzində saxlanılır. Muxtar respublikada müasir idman infrastrukturunun, olimpiya-idman komplekslərinin, idman obyektlərinin, idmanın müxtəlif növləri üzrə federasiyaların yaradılması gənclərin idmana olan marağını artırmış, istedadlı idmançıların yetişməsini təmin etmişdir. Müasir idman infrastrukturunun, eləcə də perspektivli idmançıların mövcudluğu muxtar respublikada beynəlxalq turnirlərin, mötəbər idman yarışlarının keçirilməsinə əlverişli şərait yaratmışdır. Artıq Naxçıvanda digər idman növləri ilə yanaşı, güləş üzrə də beynəlxalq yarışlar və turnirlər təşkil olunur.
“Güləş elə bir idman növüdür ki, qədimdən Azərbaycanda bu idmana maraq yüksək səviyyədə olmuşdur”, – deyən federasiya sədri bildirmişdir ki, ölkəmizdə, eləcə də muxtar respublikamızda güləş idman növünün inkişaf etməsi bir tərəfdən milli irsimizə və ənənələrimizə bağlı­lıqdan irəli gəlirsə, digər tərəfdən yaradılmış güclü maddi-texniki baza və idmana göstərilən yüksək dövlət qayğısı ilə əlaqədardır. Buna görə də Azərbaycan güləşçiləri ilə yanaşı, muxtar respublika güləşçiləri də beynəlxalq yarışlarda, dünya və Avropa çempionatlarında böyük uğurlar qazanırlar. Sərbəst güləş üzrə muxtar respublika birinciliyi də fəal idman mübarizəsi şəraitində keçəcək, idmançılar yüksək əzmkarlıq nümayiş etdirəcəklər.
Naxçıvan Muxtar Respublikası Güləş Federasiyasının sədri Azər Zeynalov idmanın inkişafına göstərdiyi diqqət və qayğıya görə bütün idmançılar adından Naxçıvan Muxtar Respublikası Ali Məclisinin Sədrinə minnətdarlığını bildirmiş, yeniyetmələr arasında keçirilən “Heydər Əliyev kuboku” uğrunda sərbəst güləş üzrə muxtar respublika birinciliyini açıq elan etmişdir.
Sonra yarışlara start verilmişdir.
Naxçıvan Muxtar Respublikası Gənclər və İdman Nazirliyi ilə Güləş Federasiyasının birgə təşkil etdiyi birincilikdə 100-dən çox pəhləvan 10 çəki dərəcəsində mübarizə aparacaqlar. I, II və III yerləri tutmuş idmançılar Naxçıvan Muxtar Respublikası Gənclər və İdman Nazirliyi tərəfindən diplomlarla və Naxçıvan Muxtar Respublikası Güləş Federasiyası tərəfindən kubok və hədiyyələrlə mükafatlandırılacaqlar.