Naxçıvan Muxtar Respublikası

İclasa sədrlik edən gənclər və idman naziri Ramil Hacı gündəlikdə olan məsələləri diqqətə çatdırıb. Çıxış zamanı ölkə idmanı dahi siyasətçinin layiqli davamçısı Prezident İlham Əliyev tərəfindən daha da inkişaf etdirildiyini və nəticədə Azərbaycanın nüfuzlu idman ölkələrindən birinə çevrildiyini deyən nazir dövlət idman siyasəti istiqamətində həyata keçirilən işlər barədə danışıb. Qeyd olunub ki, nazirlik 2022-ci ilin ötən dövrü ərzində bədən tərbiyəsi və idman sahəsi üzrə 247 tədbir keçirmiş, eyni zamanda Naxçıvan idmançıları ölkə səviyyəli yarışlarda 216, beynəlxalq turnirlərdə 63, Avropa çempionatında 33, dünya çempionatında 2, dünya kubokunda 2 medal olmaqla, 316 medal qazanıblar. Medallardan 131-i qızıl, 77-si gümüş, 108-i isə bürüncdür.

    İclasın gündəliyində olan əsas məsələnin Güləş Federasiyasına yeni sədrin seçilməsi olduğunu vurğulayan Ramil Hacı bildirib ki, 2002-ci ildə yaradılan federasiyanın hazırda yunan-Roma, sərbəst güləş, cüdo və sambo idman növləri üzrə bölmələri mövcuddur. Muxtar respublikanın bütün şəhər və rayonlarında olmaqla, ümumilikdə, 71 qrup üzrə 1323  idmançı bu sahədə aktiv fəaliyyətdədir. Ölkə və beynəlxalq arenalarda müəyyən uğurlu nəticələrin, ümumi fəaliyyət istiqamətlərində irəliləyişlərin olmasına baxmayaraq, bu sahənin inkişafı ilə bağlı yüksək potensiallardan daha səmərəli istifadə edilməlidir. Dövlətimiz tərəfindən yaradılan şərait düzgün dəyərləndirilməli, yeni təklif və fikirlər paketi hazırlanmalıdır. Azərbaycan Güləş Federasiyası və Azərbaycan Cüdo Federasiyası ilə qurulan əməkdaşlıq əlaqələri daha da yüksəldilməli, ölkə və beynəlxalq təcrübələr sınaqdan keçirilməlidir. Naxçıvan Muxtar Respublikasının Gənclər və İdman Nazirliyi digər aidiyyəti qurumlar kimi Güləş Federasiyası ilə əməkdaşlıq əlaqələrinə önəm verir, bu sahənin inkişafı üçün növbəti işləri həyata keçirməyə daim hazırdır. 
    Federasiyanın sədr müavini Faiq İsgəndərov federasiyanın cari ildəki fəaliyyəti barədə hesabat xarakterli məlumatı diqqətə çatdırıb. 
    Hesabat-seçki yığıncağında federasiyaya yeni sədr kimi Faiq İsgəndərovun namizədliyi təklif olunub. Təklif səsə qoyulub və yekdilliklə qəbul edilib.     Faiq İsgəndərov minnətdarlığını ifadə edərək etimadı layiqincə doğrultmaq üçün federasiya kollektivi ilə birgə maksimum çalışacağını, bu sahədəki öhdəliklərin uğurlu icrası istiqamətində səylə fəaliyyət göstərəcəyini bildirib.
    Gündəlikdə duran məsələlərlə bağlı hazırlanan qərar layihəsi oxunub və səs çoxluğu ilə təsdiq olunub.
    Ramil Hacı bildirib ki, muxtar respublika idmanının inkişafı ilə bağlı gələcək gözləntilər nəzərə alınmaqla qarşıda mühüm vəzifələr dayanır. O, ümid etdiyini vurğulayıb ki, aradakı birgə və məqsədyönlü fəaliyyətinin nəticəsi olaraq dövlət idman siyasəti çərçivəsində qarşıya qoyulan tələb və tapşırıqlar yerinə yetiriləcək, yeni uğurlar əldə olunacaq.